His latest draught o' breathin lea'es him
In faint huzzas.

Sages their solemn een may steek,
An' raise a philosophic reek,
An' physically causes seek,
In clime an' season;
But tell me whisky's name in Greek
I'll tell the reason.

Scotland, my auld, respected mither!
Tho' whiles ye moistify your leather,
Till, whare ye sit on craps o' heather,
Ye tine your dam;
Freedom an' whisky gang thegither!
Take aff your dram!




The Ordination

For sense they little owe to frugal Heav'n--
To please the mob, they hide the little giv'n.

Kilmarnock wabsters, fidge an' claw,
An' pour your creeshie nations;
An' ye wha leather rax an' draw,
Of a' denominations;
Swith to the Ligh Kirk, ane an' a'