That of hire smiling was ful simple and coy;
Hire gretest othe n'as but by seint Eloy:
And she was cleped Madame Eglentine.
Ful wel she sange the service divine
Entuned in hire nose ful swetely;
And Frenche she spake ful fayre and fetisly,
After the scole of Stratford atte Bowe,
For Frenche of Paris was to hire unknowe.
At mete was she wel ytaughte withalle;
She lette no morsel from hire lippes falle,
Ne wette hire fingres in hire sauce depe.

* * * * * *

And sikerly she was of great disport,
And ful plesant, and amiable of port,
And peined hire to contrefeten chere
Of court, and ben estatelich of manere,
And to ben holden digne of reverence.
But for to speken of hire conscience,
She was so charitable and so pitous,
She wolde wepe if that she saw a mous
Caughte in a trappe, if it were ded or bledde.
Of smale houndes hadde she, that she fedde
With rosted flesh, and milk, and wastel brede.
But sore wept she if on of hem were dede,
Or if men smote it with a yerde smert:
And all was conscience and tendre herte.
Ful semely hire wimple ypinched was;
Hire nose tretis; hire eyen grey as glas;