The father mixes a' wi' admonition due.

Their master's an' their mistress's command
The younkers a' are warnèd to obey; [youngsters]
An' mind their labours wi' an eydent hand, [diligent]
An' ne'er, tho' out o' sight, to jauk or play: [trifle]
'And O! be sure to fear the Lord alway,
An' mind your duty, duly, morn an' night!
Lest in temptation's path ye gang astray, [go]
Implore His counsel and assisting might:
They never sought in vain that sought the Lord aright!'

But hark! a rap comes gently to the door;
Jenny, wha kens the meaning o' the same, [knows]
Tells how a neibor lad cam o'er the moor,
To do some errands, and convoy her hame.
The wily mother sees the conscious flame
Sparkle in Jenny's e'e, and flush her cheek;
Wi' heart-struck anxious care, inquires his name,
While Jenny hafflins is afraid to speak; [half]
Weel pleased the mother hears it's nae wild worthless rake.

Wi' kindly welcome, Jenny brings him ben; [in]
A strappin' youth; he takes the mother's eye;
Blythe Jenny sees the visit's no ill ta'en;
The father cracks of horses, pleughs, and kye. [chats, cows]
The youngster's artless heart o'erflows wi' joy,
But blate and laithfu', scarce can weel behave; [shy, bashful]
The mother, wi' a woman's wiles, can spy
What makes the youth sae bashfu' an' sae grave;