That bears the name o' auld King Coil,
Upon a bonnie day in June,
When wearin' through the afternoon,
Twa dogs, that werena thrang at hame, [busy]
Forgather'd ance upon a time. [Met]

The first I'll name, they ca'd him Caesar,
Was keepit for his Honour's pleasure;
His hair, his size, his mouth, his lugs, [ears]
Show'd he was nane o' Scotland's dogs,
But whalpit some place far abroad, [whelped]
Where sailors gang to fish for cod.
His locked, letter'd, braw brass collar,
Shew'd him the gentleman and scholar;

But though he was o' high degree,
The fient a pride, nae pride had he; [devil]
But wad hae spent are hour caressin'
E'en wi' a tinkler-gipsy's messan: [mongrel]
At kirk or market, mill or smiddie, [smithy]
Nae tawted tyke, though e'er sae duddie, [matted cur, ragged]
But he wad stand as glad to see him,
An' stroan'd on stanes an' hillocks wi' him. [lanted]

The tither was a ploughman's collie, [other]
A rhyming, ranting, raving billie; [fellow]
Wha for his friend and comrade had him,
And in his freaks had Luath ca'd him,
After some dog in Highland sang,
Was made lang syne--Lord knows how lang.