The tapetless ramfeezl'd hizzie,
She's saft at best, and something lazy,
Quo' she, "Ye ken, we've been sae busy,
This month' an' mair,
That trouth, my head is grown right dizzie,
An' something sair."

Her dowff excuses pat me mad:
"Conscience," says I, "ye thowless jad!
I'll write, an' that a hearty blaud,
This vera night;
So dinna ye affront your trade,
But rhyme it right.

"Shall bauld Lapraik, the king o' hearts,
Tho' mankind were a pack o' cartes,
Roose you sae weel for your deserts,
In terms sae friendly,
Yet ye'll neglect to show your parts,
An' thank him kindly?"

Sae I gat paper in a blink
An' down gaed stumpie in the ink:
Quoth I, "Before I sleep a wink,
I vow I'll close it;
An' if ye winna mak it clink,
By Jove I'll prose it!"

Sae I've begun to scrawl, but whether