For ilka hand is free to pu'
An' steal the gem away.
But the thistle in her bonnet blue
Still bobs aboon them a';
At her the bravest darena blink,
Or gie his mou' a thraw.

Up wi' the flowers o' Scotland,
The emblems o' the free,
Their guardians for a thousand years,
Their guardians still we 'll be.
A foe had better brave the deil,
Within his reeky cell,
Than our thistle's purple bonnet,
Or bonny heather-bell.




LASS, AN' YE LO'E ME, TELL ME NOW.[59]


"Afore the muircock begin to craw,
Lass, an' ye lo'e me, tell me now,
The bonniest thing that ever ye saw,
For I canna come every night to woo."
"The gouden broom is bonny to see,
An' sae is the milk-white flower o' the haw,
The daisy's wee freenge is sweet on the lea,
But the bud of the rose is the bonniest of a'."