DONALD MACDONALD.

AIR--_"Woo'd, and married, and a'."_


My name it is Donald Macdonald,
I leeve in the Highlands sae grand;
I hae follow'd our banner, and will do,
Wherever my master[50] has land.
When rankit amang the blue bonnets,
Nae danger can fear me ava;
I ken that my brethren around me
Are either to conquer or fa':
Brogues an' brochin an' a',
Brochin an' brogues an' a';
An' is nae her very weel aff,
Wi' her brogues and brochin an' a'?

What though we befriendit young Charlie?--
To tell it I dinna think shame;
Poor lad! he cam to us but barely,
An' reckon'd our mountains his hame.
'Twas true that our reason forbade us,
But tenderness carried the day;
Had Geordie come friendless amang us,
Wi' him we had a' gane away.
Sword an' buckler an' a',
Buckler an' sword an' a';
Now for George we 'll encounter the devil,
Wi' sword an' buckler and a'!