"What the man said was this--'at the sea 'at Peter gaed oot upo'
wasna first an' foremost to be luikit upon as a teep o' the inward
an' spiritual troubles o' the believer, still less o' the troubles
o' the church o' Christ. The Lord deals wi' fac's nane the less 'at
they canna help bein' teeps. Here was terrible fac's to Peter.
Here was angry watter an' roarin' win'; here was danger an' fear:
the man had to trust or gang doon. Gien the hoose be on fire we
maun trust; gien the watter gang ower oor heids we maun trust; gien
the horse rin awa', we maun trust. Him 'at canna trust in siclike
conditions, I wadna gie a plack for ony ither kin' o' faith he may
hae. God 's nae a mere thoucht i' the warl' o' thoucht, but a
leevin' pooer in a' warl's alike. Him 'at gangs to God wi' a sair
heid 'ill the suner gang til 'im wi' a sair hert; an' them 'at
thinksna he cares for the pains o' their bodies 'ill ill believe he
cares for the doobts an' perplexities o' their inquirin' speerits.
To my min' he spak the best o' sense!"

"I didna hear him say onything like that!" said Donal.

"Did ye no? Weel, I thoucht it cam frae him to me!"

"Maybe I wasna giein' the best heed," said Donal. "But what ye say
is as true as the sun. It stan's to rizzon."

The day passed in pleasure and quiet. Donal had found another
father and mother.