"Ow ay, an' welcome! We setna up for the men o' Gotham."

"Weel, I wad spier a question gien I may."

"Speir awa'. Answer I winna insure," said the man unshaven.

"Weel, wad ye please tell me what ye ca' the justice o' God?"

"Onybody could tell ye that: it consists i' the punishment o' sin.
He gies ilka sinner what his sin deserves."

"That seems to me an unco ae-sidit definition o' justice."

"Weel, what wad ye mak o' 't?"

"I wad say justice means fair play; an' the justice o' God lies i'
this, 'at he gies ilka man, beast, an' deevil, fair play."

"I'm doobtfu' aboot that!" said a drover-looking fellow. "We maun
gang by the word; an' the word says he veesits the ineequities o'
the fathers upo' the children to the third an' fourth generation: I
never could see the fair play o' that!"

"Dinna ye meddle wi' things, John, 'at ye dinna un'erstan'; ye may
wauk i' the wrang box!" said the old man.

"I want to un'erstan'," returned John. "I'm no sayin' he disna du
richt; I'm only sayin' I canna see the fair play o' 't."