As it before tyme stod.
And why the worschipe is aweie,
If that a man the sothe seie, 850
The cause hath ben divisioun,
Which moder of confusioun
Is wher sche cometh overal,
Noght only of the temporal
Bot of the spirital also.
The dede proeveth it is so,
And hath do many day er this,
Thurgh venym which that medled is
In holy cherche of erthly thing:
For Crist himself makth knowleching 860
That noman may togedre serve
God and the world, bot if he swerve
Froward that on and stonde unstable;
And Cristes word may noght be fable.
The thing so open is at ije,
It nedeth noght to specefie
Or speke oght more in this matiere;
Bot in this wise a man mai lere
Hou that the world is gon aboute,
The which welnyh is wered oute, 870
After the forme of that figure
Which Daniel in his scripture
Expondeth, as tofore is told.
Of Bras, of Selver and of Gold
The world is passed and agon,
And now upon his olde ton
It stant of brutel Erthe and Stiel,