Noo busk me in a jacket braw,
An' tak my place
I' the ram-stam, harum-scarum raw,
Wi' smilin' face.


IV - A MILE AN' A BITTOCK


A mile an' a bittock, a mile or twa,
Abune the burn, ayont the law,
Davie an' Donal' an' Cherlie an' a',
An' the mune was shinin' clearly!

Ane went hame wi' the ither, an' then
The ither went hame wi' the ither twa men,
An' baith wad return him the service again,
An' the mune was shinin' clearly!

The clocks were chappin' in house an' ha',
Eleeven, twal an' ane an' twa;
An' the guidman's face was turnt to the wa',
An' the mune was shinin' clearly!

A wind got up frae affa the sea,
It blew the stars as clear's could be,
It blew in the een of a' o' the three,
An' the mune was shinin' clearly!

Noo, Davie was first to get sleep in his head,