That night enlisted in the core,
(Lang after kenned on Carrick shore;
For mony a beast to dead she shot,
And perished mony a bonny boat,
And shook baith meikle corn and bere,
And kept the country-side in fear.)
Her cutty sark, o' Paisley harn, {151f}
That, while a lassie, she had worn,
In longitude though sorely scanty,
It was her best, and she was vauntie.

Ah! little kenn'd thy reverend grannie,
That sark she coft for her wee Nannie, {151g}
Wi' twa pund Scots ('twas a' her riches),
Wad ever graced a dance o' witches!
But here my Muse her wing maun cour,
Sic flights are far beyond her power;
To sing how Nannie lap and flang,
(A souple jade she was, and strang,)
And how Tam stood like ane bewitched,
And thought his very een enriched;
Even Satan glowered, and fidged fu' fain,
And hotch'd and blew wi' might and main: {152a}
Till first ae caper, syne anither,
Tam tint his reason a'thegither, {152b}
And roars out, "Weel done, Cutty-sark!"
And in an instant a' was dark:
And scarcely had he Maggie rallied,
When out the hellish legion sallied.
As bees bizz out wi' angry fyke, {152c}