the sea sleepin' or ragin', ye ha'e aye room, an' naething atween
ye an' the throne o' the Almichty, to the whilk yer prayers ken the
gait, as weel 's the herrin' to the shores o' Scotlan': ye ha'e but
to lat them flee, an' they gang straucht there. But here ye ha'e
aye to luik sae gleg efter yer boady, 'at, as ye say, my lord, yer
sowl's like to come aff the waur, gien it binna clean forgotten."

"I doobt there's something no richt aboot it, Peter," returned
Malcolm.

"There maun be a heap no richt aboot it" answered Peter

"Ay, but I'm no meanin' 't jist as ye du. I had the haill thing
throu' my heid last nicht, an' I canna but think there's something
wrang wi' a man gien he canna hear the word o' God as weel i' the
mids o' a multitude no man can number, a' made ilk ane i' the image
o' the Father--as weel, I say, as i' the hert o' win' an' watter
an' the lift an' the starns an' a'. Ye canna say 'at thae things
are a' made i' the image o' God, in the same w'y, at least, 'at ye
can say 't o' the body an' face o' a man, for throu' them the God
o' the whole earth revealed Himsel' in Christ."

"Ow, weel, I wad alloo what ye say, gien they war a' to be considered
Christians."

"Ow, I grant we canna weel du that i' the full sense, but I doobt,
gien they bena a' Christians 'at ca's themsel's that, there's a
heap mair Christianity nor get's the credit o' its ain name. I min'
weel hoo Maister Graham said to me ance 'at hoo there was something
o' Him 'at made him luikin' oot o' the een o' ilka man 'at he had