LAWSON. Onyway, Deacon, ye'd put your ill-gotten gains to a
right use; they might come by the wind but they wouldna gang wi'
the water; and that's aye A SOLATIUM, as we say. If I am to be
robbit, I would like to be robbit wi' decent folk; and no think
o' my bonnie clean siller dirling among jads and dicers. [Faith,
William, the mair I think on't, the mair I'm o' Mr. Leslie's
mind. Come the night, or come the morn, and I'se gie ye my free
permission, and lend ye a hand in at the window forbye!

BRODIE. Come, come, Procurator, lead not our poor clay into
temptation. (LESLIE AND MARY TALK APART.)

LAWSON. I'm no muckle afraid for your puir clay, as ye ca't.]
But hark i' your ear: ye're likely, joking apart, to be gey and
sune in partnership wi' Mr. Leslie. He and Mary are gey and
pack, a body can see that.

[BRODIE. 'Daffin' and want o' wit' - you know the rest.

LAWSON. VIDI, SCIVI, ET AUDIVI, as we say in a Sasine, William.]
Man, because my wig's pouthered do ye think I havena a green
heart? I was aince a lad mysel', and I ken fine by the glint o'
the e'e when a lad's fain and a lassie's willing. And, man, it's
the town's talk; COMMUNIS ERROR FIT JUS, ye ken.

[OLD BRODIE. Oh!

LAWSON. See, ye're hurting your faither's hand.