Thogh I be long out of hir sight,
I am hir man both day and night,
And so will be;
Wherfor, wold God as I love hir
That she lovd me!

When she is mery, then I am glad;
When she is sory, then am I sad,
And cause whi:
For he livith nat that lovith hir
So well as I.

She sayth that she hath seen hit wreten
That 'seldyn seen is soon foryeten.'
Hit is nat so;
For in good feith, save oneli hir,
I love no moo.

Wherfor I pray, both night and day,
That she may cast al care away,
And leve in rest
That evermo, where'er she be,
I love hir best;

And I to hir for to be trew,
And never chaunge her for noon new
Unto myne ende;
And that I may in hir servise
For evyr amend.