When we cam' to the stair foot,
Ladies were dancing, jimp and sma';
But in the twinkling of an e'e,
My wee wee man was clean awa'.

* * * * *


TAMLANE.

"O I forbid ye, maidens a',
That bind in snood your hair,
To come or gae by Carterhaugh,
For young Tamlane is there."

Fair Janet sat within her bower,
Sewing her silken seam,
And fain would be at Carterhaugh,
Amang the leaves sae green.

She let the seam fa' to her foot,
The needle to her tae,
And she's awa' to Carterhaugh,
As quickly as she may.

She's prink'd hersell, and preen'd hersell,
By the ae light o' the moon,
And she's awa to Carterhaugh,
As fast as she could gang.