"And see ye na yon narrow road,
Sae thick beset wi' thorns and briers?
That is the path of righteousness,
Though after it but few enquires.

"And see ye na yon bonny road,
That winds about the ferny brae?
That is the way to fair Elfland,
Where you and I this night maun gae.

"But, Thomas, ye maun hauld your tongue,
Whatever you may hear or see;
For if ye speak word in Elfin land,
Ye'll ne'er win back to your ain countrie!"

O they rade on, and further on,
And they waded through rivers aboon the knee,
And they saw neither sun nor moon,
But they heard the roaring of a sea.

It was mirk mirk night, there was nae stern-light,
And they waded through red blude to the knee;
For a' the blude that's shed on earth,
Kins through the springs o' that countrie.

Syne they came to a garden green,
And she pu'd an apple frae a tree--
"Take this for thy wages, True Thomas;
It will give thee the tongue that can never lie!"