wilt make it clere of Fyssh seeþ ayrenn harde. & take out þe zolkes &
grinde hem with gode powdours. and alye it up with gode stewes [2]
and serue it forth.

[1] Erbis. Rather _Erbis and Fissh_.
[2] stewes. V. No. 170.


LESSHES [1] FRYED IN LENTON [2]. XX.VII. XVIII.

Drawe a thick almaunde Mylke wiþ water. take dates and pyke hem clene
with apples and peeres & mynce hem with prunes damysyns. take out þe
stones out of þe prunes. & kerue the prunes a two. do þerto Raisouns
sugur. flour of canel. hoole macys and clowes. gode powdours & salt.
colour hem up with saundres. meng þise with oile, make a coffyn as
þou didest bifore & do þis Fars [3] þerin. and bake it wel and serue
it forth.

[1] Leshes. V. Leche Lumbard in Gloss.
[2] lenton. Lentoun, Contents, i. e. Lent.
[3] Fars. Vide Gloss.


WASTELS YFARCED. XX.VII. XIX.

Take a Wastel and hewe out þe crummes. take ayrenn & shepis talow &
þe crummes of þe same Wastell powdour fort & salt with Safroun and
Raisouns coraunce. & medle alle þise yfere & do it in þe Wastel.
close it & bynde it fast togidre. and seeþ it wel.