VYANND RYAL. XX.IIII. XIX.

Take wyne greke, oþer rynysshe wyne and hony clarified þerwith. take
flour of rys powdour of Gyngur oþ of peper & canel. oþer flour of
canel. powdour of clowes, safroun. sugur cypre. mylberyes, oþer
saundres. & medle alle þise togider. boile it and salt it. and loke
þat it be stondyng.


COMPOST [1]. C.

Take rote of parsel. pasternak of rasenns [2]. scrape hem waisthe hem
clene. take rapes & caboches ypared and icorne [3]. take an erthen
panne with clene water & set it on the fire. cast all þise þerinne.
whan þey buth boiled cast þerto peeres & parboile hem wel. take þise
thynges up & lat it kele on a fair cloth, do þerto salt whan it is
colde in a vessel take vineger & powdour & safroun & do þerto. & lat
alle þise thinges lye þerin al nyzt oþer al day, take wyne greke and
hony clarified togider lumbarde mustard & raisouns corance al hool.
& grynde powdour of canel powdour douce. & aneys hole. & fenell seed.
take alle þise thynges & cast togyder in a pot of erthe. and take
þerof whan þou wilt & serue forth.

[1] Compost. A composition to be always ready at hand. Holme, III. p.
78. Lel. Coll. VI. p. 5.
[2] Pasternak of rasenns. Qu.
[3] ypared and icorne. The first relates to the Rapes, the second to
the Caboches, and means carved or cut in pieces.