The risin' sun, owre Galston muirs,
Wi' glorious light was glintin';
The hares were hirplin' down the furrs, [limping, furrows]
The lav'rocks they were chantin' [larks]
Fu' sweet that day.

As lightsomely I glowr'd abroad, [stared]
To see a scene sae gay,
Three hizzies, early at the road, [girls]
Cam skelpin' up the way. [scudding]
Twa had manteeles o' dolefu' black,
But ane wi' lyart lining; [gray]
The third, that gaed a wee a-back, [went a little]
Was in the fashion shining
Fu' gay that day.

The twa appeared like sisters twin,
In feature, form, an' claes;
Their visage wither'd, lang an' thin,
An' sour as ony slaes: [sloes]
The third cam up, hap-stap-an'-lowp, [hop-step-and-jump]
As light as ony lambie,
An' wi' a curchie low did stoop, [curtsey]
As soon as e'er she saw me,
Fu' kind that day.

Wi' bonnet aff, quoth I, 'Sweet lass,
I think ye seem to ken me;
I'm sure I've seen that bonnie face,
But yet I canna name ye.'