Quo' she, an' laughin' as she spak,
An' taks me by the hands,
'Ye, for my sake, hae gi'en the feck [most]
Of a' the ten commands
A screed some day. [rent]

'My name is Fun--your crony dear,
The nearest friend ye hae;
An' this is Superstition here,
An' that's Hypocrisy.
I'm gaun to Mauchline Holy Fair,
To spend an hour in daffin'; [mirth]
Gin ye'll go there, yon runkled pair,
We will get famous laughin'
At them this day.'

Quoth I, 'Wi' a' my heart, I'll do't;
I'll get my Sunday's sark on, [shirt]
An' meet you on the holy spot;
Faith, we'se hae fine remarkin'!'
Then I gaed hame at crowdie-time, [porridge]
An' soon I made me ready;
For roads were clad, frae side to side,
Wi' mony a wearie bodie
In droves that day.

Here farmers gash in ridin' graith [complacent, attire]
Gaed hoddin' by their cotters; [jogging]
There swankies young in braw braid-claith [strapping youngsters]
Are springin' owre the gutters. [over]