The lasses, skelpin' barefit, thrang, [padding, in crowds]
In silks an' scarlets glitter,
Wi' sweet-milk cheese, in mony a whang, [slice]
An' farls bak'd wi' butter, [cakes]
Fu' crump that day. [crisp]

When by the plate we set our nose,
Weel heaped up wi' ha'pence,
A greedy glow'r Black Bonnet throws, [the elder]
An' we maun draw our tippence.
Then in we go to see the show:
On ev'ry side they're gath'rin';
Some carryin' deals, some chairs an' stools, [planks]
An' some are busy bleth'rin' [gabbling]
Right loud that day.

Here stands a shed to fend the show'rs, [keep off]
An' screen our country gentry;
There racer Jess an' twa-three whores
Are blinkin' at the entry.
Here sits a raw o' tittlin' jades, [whispering]
Wi' heavin' breasts an' bare neck,
An' there a batch o' wabster lads, [weaver]
Blackguardin' frae Kilmarnock
For fun this day.

Here some are thinkin' on their sins,
An' some upo' their claes; [clothes]
Ane curses feet that fyl'd his shins, [soiled]
Anither sighs an' prays: